पिंपरी, ता. २५ : पिंपरी-चिंचवड शहरातील स्वस्त धान्य दुकानांमध्ये गेल्या दहा दिवसांपासून ठप्प झालेली धान्य वाटप व्यवस्था अखेर सुरळीत झाली. ‘ई-पॉस’ (इलेक्ट्रॉनिक पॉइंट ऑफ सेल) यंत्रातील तांत्रिक अडचणी दूर झाल्या. त्यामुळे दुकानदारांकडून धान्य वाटप सुरू केल्यामुळे शिधापत्रिकाधारकांना दिलासा मिळाला आहे.
ऑगस्‍ट महिन्यातील वाटपास अधिकृतपणे सुरवात झाली. शिधापत्रिकाधारकांना शासन दरमहा तांदूळ, गहू, साखर व इतर जीवनावश्यक वस्तू स्वस्त दरात पुरविते. गेल्या काही दिवसांपासून यंत्रातील तांत्रिक बिघाडामुळे शेकडो दुकानदार अडचणीत सापडले होते. या प्रणालीवर आधार कार्ड, बायोमेट्रिक पडताळणी आणि वितरण यंत्रणा चालते. यंत्रात बिघाड झाल्यामुळे लाभार्थ्यांच्या बोटाचे ठसे स्वीकारले जात नव्हते. परिणामी वितरणात खंड पडला होता.
शहरातील विविध भागांतील नागरिकांनी रास्त धान्य दुकानदारांकडे अनेक वेळा धान्यासाठी रांगा लावल्या. मात्र प्रणाली काम करत नसल्याने त्यांना धान्य मिळू शकले नाही. यामुळे नागरिकांमध्ये तीव्र नाराजी होती. काही ठिकाणी संतप्त नागरिकांनी आक्रमक प्रतिक्रिया दिली होती. दुकानदारांनीही तांत्रिक अडचणीची माहिती अन्न व नागरी पुरवठा विभागाला दिली होती.
‘ई-पॉस’ प्रणालीचे सेवा पुरवठादार आणि नागरी पुरवठा विभाग यांच्या समन्वयातून अखेर ही समस्या सुटली. यंत्रांची संगणक प्रणाली (सॉफ्टवेअर) अद्ययावत (अपडेट) करण्यात आली. त्यामुळे यंत्रणा पुन्हा कार्यान्वित झाली. गुरुवारपासून शहरातील बहुतांश रास्त धान्य दुकानांमध्ये वितरण प्रक्रिया पूर्ववत सुरू झाली.
दर महिन्याप्रमाणे तांदूळ, गहू, साखर, डाळी पुन्हा निर्धारित प्रमाणानुसार मिळू लागले आहेत. जून आणि जुलैचे वाटप पूर्ण झाले आहे.
---
‘ई-पॉस’ यंत्रणेतील तांत्रिक बिघाडामुळे धान्‍य वाटप बंद होते. आता ही यंत्रणा दुरुस्त झाली आहे. त्यामुळे धान्‍य वाटप सुरू झाले आहे.
- विजयकुमार क्षीरसागर, परिमंडळ अधिकारी, चिंचवड
-----