पिंपरी, ता. २५ : पिंपरी-चिंचवड महानगरपालिका आणि जिल्हा क्रीडा परिषद पुणे यांच्यातर्फे सुब्रतो मुखर्जी कप फुटबॉल स्पर्धा नुकतीच पार पडली.
१७ वर्षांखालील मुलींच्या गटात तृतीय क्रमांकासाठी झालेल्या सामन्यात एस.एन बी.पी. स्कूल, चिखलीने पोद्दार इंटरनॅशनल स्कूल, ताथवडेचा ४-१ असा पराभव करत बाजी मारली. मृणाल साखरे, आर्या आल्हाट, दिव्यांका देशमुख व निष्का वर्गीस यांनी प्रत्येकी एक गोल केला. पोद्दारकडून अर्णा जी. हिने एकमेव गोल केला. १५ वर्षांखालील मुलांच्या गटात, एकूण ९ सामने खेळविण्यात आले. पोद्दार इंटरनॅशनल स्कूलने विबग्योर राईज स्कूल, चिंचवडला ३-१ ने पराभूत केले. आर्मी पब्लिक स्कूलने इंदिरा नॅशनल स्कूलवर २-० अशी मात दिली. पीसीएमसी बोपखेल इंग्लिश मीडियम स्कूलने क्रिमसन अनिसा स्कूलचा २-१ ने पराभव केला. एम्प्रोस इंटरनॅशनल स्कूलने बर्डस इंटरनॅशनल स्कूलला २-० ने हरवले. विद्यानिकेतन स्कूलने ॲकॅडमिक हाईट्स स्कूलवर २-० असा विजय मिळवला. इनफंट जीझस स्कूलने श्रमिकनगर प्रा. शाळेला ३-० ने नमवले. सेंट ज्युड हायस्कूल, देहूरोडचे अटीतटीच्या सामन्यात विबग्योर स्कूलला ५-४ ने पराभूत केले. दुसऱ्या सामन्यात विद्यानिकेतन स्कूल, पिंपरीने आर्मी पब्लिक स्कूलवर २-० ने विजय मिळवला. अखेरच्या सामन्यात पोद्दार इंटरनॅशनल स्कूल, चिंचवडने इनफंट जीझस स्कूलचा ४-१ ने पराभव केला. सहभागी विद्यार्थ्यांनी आगामी स्पर्धांसाठीची तयारी सिद्ध केली. अशा स्पर्धांमुळे नवोदित खेळाडूंना संधी मिळते असे आयोजकांनी सांगितले.