सोमाटणे, ता. २६ : संततधार पाऊस आणि सलग सुट्यांमुळे मावळ परिसरात पर्यटक आणि प्रवाशांची मोठी गर्दी झाली. परिणामी, येथे मोठ्या प्रमाणात वाहतूक कोंडी होऊन वाहनांच्या लांबच लांब रांगा लागल्या आहेत.
शनिवार आणि रविवारची सलग सुट्टी, त्यात गेल्या चार दिवसांपासून मावळात सुरू असलेल्या मुसळधार पावसाचा आनंद घेण्यासाठी शहरी भागातील पर्यटक मोठ्या संख्येने मावळात दाखल झाले. यासोबतच गावाकडे जाणाऱ्या प्रवाशांचीही संख्या लक्षणीय होती. परिणामी, पुणे-मुंबई महामार्गावर सोमाटणे परिसरात वाहनांची प्रचंड गर्दी झाली.
वाहतूक कोंडीची परिस्थिती सोमाटणे चौकात अधिक तीव्र झाली. कारण येथे अरुंद रस्ते आणि अतिक्रमणामुळे मार्ग अधिकच अडथळाग्रस्त झाला आहे. त्यात आणखी भर लोकप्रतिनिधींच्या वरदहस्ताने सेवा रस्त्यावर अतिक्रमण करणाऱ्या विक्रेत्यांची पडली. पोलिस प्रशासनाने वाहतूक सुरळीत करण्यासाठी प्रयत्न केले, मात्र अरुंद रस्ते आणि अतिक्रमणामुळे त्यांच्या प्रयत्नांना मर्यादा आल्या. परिणामी, पर्यटक व प्रवाशांना वाहतूक कोंडीचा त्रास सहन करावा लागला.

PNE25V34530
---