वाचक लिहितात

‘वाहतूक कोंडी आता रुग्णांच्याही जिवावर ही बातमी वाचली (सकाळ टुडे, २७ जुलै). वास्तविक पिंपरी-चिंचवड महानगरपालिका विभागात रस्ते रुंद आहेत. बहुतेक चौकांमध्ये सिग्नल व्यवस्था आहे. चौकाचौकात वाहतूक पोलिस असूनही जिकडे-तिकडे वाहतूक कोंडी झालेली असते. आता पावसाळ्यामुळे बहुतेक रस्त्यांवर प्रचंड खड्डे पडले आहेत. त्यामुळे वाहतूक कोंडीत भर पडत आहे. हे खरे असले तरी त्यावर पर्याय नाही. कंत्राटदार आणि भ्रष्ट नेत्यांमुळे साऱ्या देशातच अशी परिस्थिती आहे. वाहतूक कोंडीचे प्रमुख कारण बघितले तर ते बेशिस्त वाहतूक हेच आहे. वाहतुकीचे नियम पाळण्याची आपल्याला जणू काही ऍलर्जी आहे. वाहतुकीचे नियम न पाळणे, सिग्नल ओलांडून आपली गाडी पुढे घुसवणे, प्रवेश बंदी असलेल्या रस्त्यावर गाडी चालवणे, वाहतूक परवाना नसतांनाही गाड्या चालवणे, गर्दीच्या रस्त्यावर आपलीच गाडी पुढे दामटण्याचा प्रयत्न करणे, भरधाव वेगाने गाडी चालवणे अशा अनेक गोष्टींमुळे वाहतूक कोंडी होत आहे. त्या कोंडीत एखादी रुग्णवाहिका, अग्निशामक वाहन अडकले तर काय होईल याची कल्पना करणेही अवघड आहे.
- शिवराम वैद्य, निगडी
-----