एमआयडीसीकडून
बुजलेल्‍या नाल्‍यांचे सर्व्हेक्षण
पिंपरी, ता. २ : पुणे महानगर प्रदेश विकास प्राधिकरणासह (पीएमआरडीए) एमआयडीसी व इतर सर्वच शासकीय संस्‍थांकडून अनधिकृत कामांवर हातोडा टाकला जात आहे. त्‍यासाठी नाल्‍यांवरील बांधकामे रडारवर आली आहेत. त्‍याचा एक भाग म्‍हणून हिंजवडीतील नाल्यांची संख्या, त्याची स्थिती, बुजविण्यात आलेली व बुजविण्याची कारणे यासह नेमक्या परिस्थितीची पाहणी एमआयडीसीकडून करण्यात येणार आहे. हिंजवडी आयटी पार्क फेज १, २ आणि ३ या ठिकाणी तसेच, माण परिसरात ड्रोनद्वारे पाहणी, सर्व्हेक्षण पूर्ण झाले आहे. त्याचा अहवाल आल्यानंतर कारवाईला अधिक प्राप्‍त होणार आहे.
आयटी पार्कमध्ये पूर परिस्थिती निर्माण होण्याचे मुख्य कारण हे नाल्याचा प्रवाह वळवणे, अडविणे असे निदर्शनास आल्यानंतर अशा नऊ प्रकल्पांचा शोध घेण्यात आला होता. संबंधित ठिकाणी पाटबंधारे विभागाकडून नाल्याची रुंदी व क्षेत्र प्राप्त करण्यात येत असून, त्यानंतर टंडन सोल्युशन या एजन्सीकडून नाल्याचा प्रवाहानुसार निचरा योग्य होण्याबाबत कार्यवाही करण्यात येणार आहे. आयटी पार्क परिसरातील नाल्यांवर काही नियमांतर्गत पीएमआरडीए, एमआयडीसी यांनी बांधकाम परवानगी दिली आहे. मात्र, त्याचे नेमके पालन बांधकाम व्यावसयिक, आस्थापानाकडून झाले नाही. त्यात काम करताना ओढा, नाला बेकायदेशीरपणे वळवला असल्याचे निर्दशास आले आहे. त्या ठिकाणी ओढयाचे पाणी वाहून नेण्यासाठी असलेली जागा कमी केले. तर, काही ठिकाणी ती झाकून टाकली. त्याचा नेमका अभ्यास, सर्व्हेक्षणाचे काम टंडन सोल्यूशन करणार आहे. त्यानुसार तो अहवाल तयार करण्यात येत आहे.