प्रदीप लोखंडे : सकाळ वृत्तसेवा
पिंपरी, ता. २ : पुणे महानगर प्रदेश विकास प्राधिकरणाच्‍या (पीएमआरडीए) चार नगर नियोजन (टाऊन प्‍लॅनिंग-टीपी) योजनांना अंतिम मंजुरी मिळाली आहे. त्यानंतर विचाराधीन असलेल्‍या १५ टीपी योजना अमलात येण्याची प्रतिक्षा आहे. त्‍यासाठी प्रशासन आराखडा तयार करीत आहे. नागरिकांच्‍या सूचना विचारात घेऊन योजनांची आखणी होईल.
योजनांच्या अंमलबजावणीनंतर ‘पीएमआरडीए’ अंतर्गत २३ किलोमीटरचा रिंगरोड करण्यात येईल. त्‍यामुळे अहमदनगर, सोलापूरकडे जाणाऱ्या वाहनधारकांची सोय होईल. महत्त्वाचे म्हणजे पुण्यातील वाहतुकीवरील ताणही कमी होईल.
हिंजवडीसह पुणे जिल्‍ह्यातील वाहतुकीवरील ताण कमी करण्यासाठी राज्‍य शासनाने पुण्याबाहेरून रिंगरोड प्रस्‍तावित केले आहेत. टीपी योजनाही अमलात आणल्‍या जात आहेत. ‘पीएमआरडीए’चा विकास आराखडा रद्द झाल्‍यानंतर टीपी योजना करण्यास राज्‍य शासनाने परवानगी दिली आहे. त्‍यानुसार ‘पीएमआरडीए’ने दाखल केलेल्‍या वडाचीवाडी, औताडे - हांडेवाडी आणि होळकरवाडीसाठी दोन अशा एकूण चार योजना शासनाने मंजूर केल्या. त्‍यानंतर १५ टीपी योजनांबाबत कार्यवाही सुरू झाली आहे.
सध्या ‘पीएमआरडीए’ प्रशासनाच्‍या पातळीवरच कार्यवाही होत आहे. यामध्ये सुरवातीला संबंधित नागरिकांना बोलावून सुनावणी होईल. ज्‍यांच्‍या जागा जाणार त्‍यांना कोणत्‍या सुविधा हव्‍या आहेत. विहीर, कूपनलिका आहे का, संबंधित जागेवर बांधकामासाठी कोणती परवानगी घेण्यात आली आहे का आदी बाबींचा आढावा घेण्यात येईल. त्‍यानंतर नकाशा तयार केला जाईल. नागरिकांच्‍या मागणीनुसार आराखडा तयार होणार आहे. तो मंजुरीसाठी शासनाकडे पाठविला जाईल. या योजना मंजूर झाल्‍यास गुंठेवारी विकसित होईल. रिंगरोडसाठी भूसंपादन होईल.
---
चार योजनांना गती
वडाचीवाडी, औताडे - हांडेवाडी आणि होळकरवाडीसाठी दोन अशा चार योजना मंजूर झाल्‍यामुळे त्‍याअंतर्गत येणाऱ्या रिंगरोडसाठीचे बहुतांश क्षेत्र प्रशासनाच्या ताब्यात आले आहे. आता गुंठेवारी विकसित करण्यासाठी संबंधित क्षेत्र ताब्यात घेण्याची कार्यवाही होईल. उपलब्ध क्षेत्राबाबत लवकरच निविदा प्रक्रिया राबवून रस्‍ते करण्यात येतील.
---
नव्‍या योजना
‘पीएमआरडीए’ अंतर्गत ६५ मीटर रुंद वळणरस्त्याचे क्षेत्र मिळविण्यासाठी १५ टीपी योजना घोषित करण्याबाबत जाहीर सूचना देण्यात आली आहे. पुढील गावांत योजना होणार ः १) वाघोली, २) आव्हाळवाडी, ३) मांजरी खुर्द १, ४) मांजरी खुर्द २, ५) मांजरी खुर्द ३, ६) वडकी (ता. हवेली), ७) माण (मुळशी), ८) धामणे १, ९) धामणे २ , १०) गोदुंबरे, ११) दारुंबरे/ साळुंब्रे १, १२) दारुंबरे/ साळुंब्रे २, १३) सांगवडे (ता. मावळ), १४) नेरे, १५ बावधन बुद्रूक (ता.मुळशी)
----
नव्याने प्रस्तावित केलेल्या १५ योजनांबाबत स्थानिक पातळीवरील लोकप्रतिनिधी, शेतकऱ्यांशी चर्चा करूनच पुढील निर्णय घेण्यात येईल. मुख्य म्हणजे गावनिहाय बैठका घेऊन शेतकऱ्यांची बाजू समजून घेण्यात येईल. त्यांच्या सूचना विचारात घेऊन पुढील आराखडे तयार करण्यात येतील.
- डॉ. योगेश म्हसे, आयुक्त, ‘पीएमआरडीए’
-----