पिंपरी, ता. २ : शेअर बाजारात गुंतवणुकीसाठी बनावट अॅपचा वापर करून एकाची ५४ लाख साठ हजारांची आर्थिक फसवणूक करणाऱ्या पाच आरोपींना पिंपरी-चिंचवड सायबर पोलिसांनी मध्य प्रदेश आणि दिल्लीतून अटक केली. पुनम मांगीलाल जैन (वय ४२, रा. इंदूर), गणेश पूनमचंद ढोले (वय २८, रा. बडवानी, दोघे मध्य प्रदेश), रॉकी ऊर्फ राजेश जयप्रकाश कुशवाह (वय २८), हर्षित ओमप्रकाश घोटन (वय २८, दोघेही रा. मालवीयनगर, दिल्ली) प्रदीप कुमार मदनलाल कुमार केन (वय ३०, रा. महिपालपूर) अशी आरोपींची नावे आहेत. याप्रकरणी सायबर पोलिस ठाण्यात फसवणुकीचा गुन्हा दाखल आहे. आरोपींनी फिर्यादीला ऑनलाइन लिंक पाठवून ब्लिंकएक्सप्रो हे ट्रेडिंग अॅप डाऊनलोड करायला लावले. त्यानंतर फिर्यादीला ५४ लाख ६० हजार रुपयांची गुंतवणुक करण्यास भाग पाडण्यात आले. नंतर कोणताही परतावा न देता त्यांची फसवणूक केली. आरोपींनी गुन्ह्यासाठी वापरलेल्या बँक खात्याची माहिती घेऊन पोलिसांनी तपास केला. पुनम जैनकडून वेगवेगळ्या बँकांची पाच एटीएम कार्ड, एक धनादेश पुस्तिका, दोन मोबाईल तसेच गणेश ढोलेकडून एक मोबाईल जप्त करण्यात आला.
--------------