सोमाटणे, ता. ३ : पवना नदीवरील सांगवडे पुलावरील वाहतूक नवीन पुलाचे काम पूर्ण होईपर्यंत पूर्णपणे बंद राहणार आहे. वाहनचालकांनी सांगवडे पुलावरून अडथळा तोडून वाहतूक सुरू केली होती. याबाबतचे वृत्त ‘सकाळ’मध्ये प्रसिद्ध होताच संबंधित विभागाने कार्यवाही केली आहे.
सांगवडे पूल हा केवळ पादचारी आणि दुचाकी वाहनांसाठी बांधण्यात आला होता. मात्र, काही काळापूर्वी चारचाकी वाहने पुलावरून चालू झाल्याने पुलाचे स्तंभ, स्लॅब आणि अँगल तुटले. त्यामुळे हा पूल वाहतुकीसाठी धोकादायक झाला. सार्वजनिक बांधकाम विभागाने दोन वर्षांपूर्वी पुलाच्या प्रवेशद्वारावर अडथळा बांधून चारचाकी वाहनांसाठी पूल बंद केला होता. पूल धोकादायक असल्याची सूचना फलकांद्वारेही लावण्यात आली होती. तरीही काही वाहनचालकांनी हा अडथळा तोडून वाहतूक पुन्हा सुरू केली होती. याबाबतचे वृत्त ‘सकाळ’मध्ये प्रसिद्ध होताच संबंधित विभागाने कुंडमळ्याच्या घटनेची पुनरावृत्ती टाळण्यासाठी, जेसीबीच्या साहाय्याने पुलाच्या प्रवेशद्वारावर अवजड दगड टाकून पूर्ण वाहतूक बंद केली आहे. दरम्यान, नवीन पुलाचे काम वेगाने सुरू असून, काम पूर्ण होईपर्यंत जुना लोखंडी पूल वाहतुकीसाठी कायमचा बंद राहणार आहे.

PNE25V36868
---