‘त्या’ हत्तीणीला आनंदाने जगू द्या
महादेवी (माधुरी) हत्तीण- एक शांत, सश्रद्ध प्राणी. गेली अनेक वर्षे तिने माणसांच्या सान्निध्यात आयुष्य घालवले. पण आता, तिचे वय, आरोग्य आणि तिची मनःस्थिती, हे सर्व लक्षात घेणे आवश्यक आहे. त्यामुळे तिच्यासाठी ‘वनतारा’ किंवा त्यासारख्या इतर दुसऱ्या संस्था अथवा सरकारी अभयारण्यात पाठवणे योग्य ठरेल. अशा ठिकाणांवर या प्राण्यांची उत्तम काळजी घेतली जाते. तेथे नैसर्गिक, मोकळं आणि जिवंत वातावरण आहे, अशा ठिकाणी तिला पाठवणे योग्य ठरेल. ही वेळ आहे भावना, राजकारण, प्रसिद्धी बाजूला ठेवून माधुरीसाठी योग्य काय? याचा विचार करण्याची. प्रत्येक जीवाला स्वतःचे मोकळे आकाश, सुरक्षित माती आणि मनःशांतीची गरज असते. माणूस असो की प्राणी, तिलाही तिच्या ‘होमोजिनियस’ हत्तींच्या कळपामध्ये मिसळण्याचा अधिकार आहे. तिलाही आई होण्याचा अधिकार आहे. तिलाही तिचे स्वतःचे कुटुंब असण्याचा अधिकार आहे. ‘जगा आणि जगू द्या’ हा संदेश आपण कधीच विसरू नये. कोणतीही संस्था, जागा किंवा निर्णय हा मानवी स्वार्थाच्या आधारावर नव्हे, तर प्राणी कल्याणाच्या दृष्टीने सर्वतोपरी योग्य असाच असावा.
- साधना सवाने-जैन, पिंपरी