पिंपरी, ता. ४ : क्षणात भांडण , क्षणात गोडवा, कधी एकमेकांची घेण्यात येणारी काळजी, तर कधी हक्काने एकमेकांवर गाजवण्यात येणारा अधिकार, प्रसंगी मित्र म्हणून केलेली गुपितांची देवाणघेवाण तर कधी आई-वडिलांच्या मायेने केलेली कानउघाडणी... भावा-बहिणीचे नाते असेच असते. या नात्याची वीण अधिक घट्ट करणारा सण म्हणजे राखीपौर्णिमा. याच सणासाठी सध्या बाजारपेठा सजल्या आहेत.
या दिवशी बहिण भावाला राखी बांधते आणि भाऊ बहिणीला सतत पाठीशी उभे राहण्याचे आणि रक्षण करण्याचे वचन देतो. आपल्या भावासाठी सुंदर आणि ‘हटके’ राखी घेण्यासाठी महिला व तरुणी गर्दी करत आहेत. यंदा चंदनाचा सुगंध, रुद्राक्षासह ‘इव्हील आय’ राख्यांना मागणी आहे.

वैविध्यपूर्ण राख्या
गेल्या काही वर्षांपासून राखी ऑनलाइन घेण्याकडेही तरुणींचा कल आहे. मात्र प्रत्यक्ष राखी खरेदी करण्यासाठीही पिंपरी, चिंचवड, निगडी, आकुर्डी या भागांसह उपनगरांमधील बाजारपेठांमध्ये महिलांची मोठी गर्दी होत आहे. यामध्ये शंकराची पिंड आणि प्रतिमा असणाऱ्या राख्यांनाही विशेष मागणी आहे.
गेल्या वर्षी बाजारात आलेल्या ‘इव्हील आय’ राख्या यंदाही मोठ्या प्रमाणावर विकल्या जात आहेत. लहान मुलांसाठी म्युझिक राखी, लाइट राखी, बॅटमॅन, छोटा भीम, कार्टून राखी असे असंख्य प्रकार उपलब्ध आहेत. घाऊक बाजारात राख्यांची किंमत १० रुपयांपासून २०० रुपयांपर्यंत आहे.

भाऊ आणि वहिनीसाठी राखी
राज्यात काही ठिकाणी भावासोबत वहिनीलाही राखी बांधण्याचा रिवाज आहे. आता हा रिवाज ठिकाणी पडतो आहे. त्यामुळे कपल राखी, वाहिनी साठी गोंडा राखी असे असंख्य प्रकार पाहायला मिळत आहेत. हौस म्हणून राखीऐवजी वाहिनीसाठी ब्रेसलेट, घड्याळाची खरेदीही होताना दिसत आहेत. या राख्या बाहेर पाठविण्यासाठी आकर्षक पॅकिंगही उपलब्ध आहेत. याची किंमत ५० रुपयांपासून पुढे आहे.
पर्यावरणपूरक व चांदीची राखी
राखीपौर्णिमेनंतरही राखीचा उपयोग व्हावा यासाठी विविध झाडांच्या बिया असलेली राखीही गेल्या काही वर्षांपासून ऑनलाइन विक्रीसाठी उपलब्ध होत आहेत. विविध झाडांच्या बियाही कलात्मक पद्धतीने वापरल्या जातात. पावसाळ्यात अनेक ठिकाणी वृक्षारोपण केले जाते. यानिमित्ताने वृक्षारोपण व्हावे असा दृष्टिकोन असल्याचे मुलींनी सांगितले. पारंपारिकता आणि नावीन्यपूर्णतेचा अनोखा मिलाफ असलेल्या चांदीच्या राख्या व ब्रेसलेट खरेदी करण्याकडेही महिला वळत आहेत.
---
राख्यांमध्ये दरवर्षी वेगवेगळी व्हरायटी येत असते. श्रावण महिन्यात राखीपौर्णिमा येत असल्याने रुद्राक्ष, गणपती, महादेव यांच्या प्रतिमा असलेल्या राख्यांना मोठी मागणी आहे. अगदी देवाला वाहण्यासाठी पाच रुपयांपासून ३०० रुपयांची राखी आमच्याकडे उपलब्ध आहे. गेल्या वर्षी नवीन आलेल्या ‘इव्हील आय’ राखीला यंदाही मोठी मागणी आहे.
- पवन इसरानी, विक्रेता, पिंपरी
---
सध्या ऑनलाइन तर सगळं काही मिळतं. मात्र, बाजारात प्रत्यक्षात येऊन राखी घेण्याचाही आनंद वेगळाच असतो. मी दरवर्षी नात्यातील भावांना कुरिअरने राख्या पाठवते. यंदाही माझ्यासाठी व मुलीसाठी मिळून दोन डझन राख्या घेतल्या आहेत.
- मुक्ता नहाणे-कानगुडे, महिला ग्राहक
-----