पिंपरी, ता. १५ ः शालेय नेतृत्व अधिक सक्षम करण्याच्या दिशेने एक महत्त्वपूर्ण पाऊल टाकत, पिंपरी-चिंचवड महापालिकेच्या अकरा मास्टर ट्रेनर्स आणि तीन पर्यवेक्षकांनी क्रिएटनेट एज्युकेशन व आकांशा फाउंडेशन यांच्या संयुक्त विद्यमाने आयोजित चार दिवसीय राष्ट्रीय प्रशिक्षण कार्यशाळेत सहभाग घेतला. ही कार्यशाळा मध्यप्रदेशातील होशंगाबाद येथे ‘एकलव्य’ स्वयंसेवी संस्थेत झाली. महापालिका शाळांमधील मुख्याध्यापकांसाठी कार्यशाळा होती. त्यामध्ये ‘टोटो-चान’ आणि ‘दिवसस्वप्न’ यांसारख्या प्रेरणादायी पुस्तकांवरील चर्चा, शालेय भेटींमधून आलेले अनुभव व उत्तम शैक्षणिक पद्धतीविषयी सविस्तर माहिती शहरातील प्रतिनिधींनी दिली. महापालिका शाळांमधील मास्टर ट्रेनर्स मुख्याध्यापकांना सहकार्य करत असताना स्वतःही सतत नवनवीन गोष्टी शिकत आहेत आणि विकसित होत आहेत. त्यांची शिकण्याची उत्सुकता, सहकार्याची वृत्ती आणि नावीन्यपूर्ण गोष्टी शिकण्याची तयारी नक्कीच शाळांमध्ये सकारात्मक बदल घडवून आणेल, असे मत आयुक्त शेखर सिंह यांनी व्यक्त केले.