पिंपरी, ता. १० : पिंपरी-चिंचवड हद्दीतील पोलिसांच्या पाल्यांसाठी बुधवार (ता. ९) एसएनबीपी इंटरनॅशनल शाळेत रहाटणी रोजगार मेळाव्याचे आयोजन करण्यात आले. यात ३७ कंपन्यांनी सहभाग घेतला. यामध्ये पोलिसांच्या १३६ पाल्यांना रोजगार मिळाला. तर, ५२ जणांची अंतिम फेरीसाठी निवड करण्यात आली.
राज्य शासनाच्या १०० दिवसीय कृती कार्यक्रमाअंतर्गत पोलिस आयुक्त विनयकुमार चौबे यांच्या संकल्पनेतून हा उपक्रम राबवण्यात येत आहे. यावेळी चौबे यांच्यासह अपर पोलिस आयुक्त वसंत परदेशी, उपायुक्त डॉ. शिवाजी पवार, उपायुक्त विशाला गायकवाड, सहायक आयुक्त सुनील कुऱ्हाडे आदींसह विविध कंपन्यांचे प्रतिनिधी, एचआर उपस्थित होते. या मेळाव्याला २५० हून अधिक पोलिस पाल्य उपस्थित होते.
कार्यक्रमावेळी चौबे म्हणाले, ‘‘पोलिस पाल्यांनी मिळालेल्या संधीचे सोने करावे. तसेच आपली मेहनत, अपार कष्ट, शिस्त व जबाबदारीचे पालन करून आपला आणि नियुक्त होणाऱ्या कंपनीचा उत्कर्ष करावा. जबाबदारी प्रामाणिकपणे पार पाडावी.’’