पिंपरी, ता. ९ ः ‘मूर्ती लहान पण कीर्ती महान’, अशी अण्णा बनसोडे यांची ख्याती आहे. त्यांना खूप मोठे पद मिळाले आहे. आता सर्वांचे बारीक लक्ष राहणार आहे. आपल्या चिरंजीवांना चांगल्या चार गोष्टी सांगा, मी पण माझ्या चिरंजीवांना सांगत असतो. ‘गडी अंगाने उभा नी आडवा’ म्हणत एका ठिकाणी राहून काम करावे लागते. तळ्यात-मळ्यात चालणार नाही,’ अशा शब्दांत उपमुख्यमंत्री अजित पवार यांनी आजी-माजी आमदारांचे कान टोचले.
राष्ट्रवादीचे आमदार अण्णा बनसोडे यांची नुकतीच विधानसभा उपाध्यक्षपदी निवड झाली. यानिमित्त पिंपरी-चिंचवड शहर राष्ट्रवादी कॉंग्रेसने त्यांचा काळेवाडी येथे उपमुख्यमंत्री पवार यांच्या हस्ते नागरी सत्कार केला. त्यात ते बोलत होते. खासदार श्रीरंग बारणे, आमदार शंकर जगताप, अमित गोरखे, माजी आमदार विलास लांडे, राष्ट्रवादीचे शहराध्यक्ष योगेश बहल, महिला अध्यक्षा कविता आल्हाट आदींसह महायुतीतील घटक पक्षांचे काही पदाधिकारी उपस्थित होते. पवार म्हणाले, ‘‘महायुतीचे सरकार निवडून आल्यानंतर विरोधकांनी आमच्यावर आरोप केले. पण, लाडक्या बहिणींच्या आशीर्वादाने हे सरकार सत्तेत आले. आमच्यावर टीका केली तरी चालेल पण, गरिबांचा विचार आम्ही कधी सोडणार नाही. आर्थिक शिस्त बाळगून शहरांचा विकास केला पाहिजे. विमानतळ करताना काही भूधारकांच्या जमिनी जात आहेत. जिल्ह्यात आंतरराष्ट्रीय विमानतळ होत असताना त्याला विरोध करणे योग्य नाही. रिंगरोडचेही काम मार्गी लागत आहेत. यात देखील स्थानिकांच्या जमिनी जाणार आहेत. पण, त्यांनी वाईट वाटून घेण्याचे कारण नाही. त्यांना चांगला मोबदला दिला जाईल. शहरातील मेट्रो चाकण एमआयडीसीपर्यंत केली जाणार आहे. वाकड, रावेतचा भाग मेट्रोला जोडला जाणार आहे.’’

अजित पवार म्हणाले....
- इंद्रायणी आणि पवना नदीचे प्रदूषण कमी करण्यासाठी प्रयत्न केले जाणार आहेत.
- नदी सुधार प्रकल्पाबाबत काहींचे वेगळे मत आहे, त्याचा जरूर विचार केला जाईल.
- चांगल्या गोष्टींसाठी दोन पाऊले पुढे किंवा मागे येण्याची आमची तयारी आहे.
- पिंपरी-चिंचवडसाठी पवना धरणाचे पाणी कमी पडत आहे.
- भामा-आसखेडचे पाणी आणले जात आहे, आंद्रा धरणातील पाणी घेत आहोत, तरीही पाण्याची कमतरता भासत आहे.
- यापुढील पन्नास वर्षाचा विचार करून, पाण्याचे नियोजन करावे लागेल.
- पुण्यासह पिंपरी-चिंचवड शहरासाठी मुळशी धरणातील पाणी कसे आणता येईल, यासाठी प्रयत्न केले जातील.
- पीएमआरडीएच्या माध्यमातून जिल्ह्याचा विकास करताना शंभर मीटरहून अधिक मोठे रस्ते केले जाणार आहेत.
- म्हाडा, एसआरए, महापालिका, पीएमआरडीएच्या माध्यमातून गृहनिर्माणाला चालना दिली जाणार आहे.

सर्वसामान्यांचे प्रश्‍न सोडविणार ः बनसोडे
माझ्यासारख्या सर्वसामान्य कार्यकर्त्याला एवढ्या मोठ्या पदावर बसवण्याची दानत राष्ट्रवादी आणि अजित पवार यांच्यातच आहे. एवढ्या मोठ्या पदावर बसलो असलो तरी सर्वसामान्यांचे प्रश्न सोडवण्यासाठी आणि पिंपरी मतदार संघातील प्रत्येक घटकाला न्याय देण्यासाठी पदाचा उपयोग करेन, अशी कृतज्ञता विधानसभा उपाध्यक्ष अण्णा बनसोडे यांनी व्यक्त केली.

फोटो ः 05159