पिंपरी, ता. १९ : बांधकाम साहित्य पुरवण्याचे काम न दिल्याने नुकसान झाल्याचे सांगून एक लाखाची खंडणी मागत जिवे मारण्याची धमकी दिली. हा प्रकार हिंजवडी पोलिस ठाण्याच्या हद्दीतील रासझींग स्पेसेस कंपनीत घडला.
या प्रकरणी अनिल अंभुरे (रा. महादेवनगर, सुस) यांनी हिंजवडी पोलिस ठाण्यात फिर्याद दिली. त्यानुसार पोलिसांनी दत्तात्रय ठाकर, चेतन ओव्हाळ, सुशांत भालेकर आणि संदीप देशभ्रतार यांना अटक केली. त्यांना न्यायालयात हजर केले असता दोन दिवसांची पोलिस कोठडी सुनावली आहे. फिर्यादी रासझींग स्पेसेस या कंपनीत कामाला असून ते कार्यालयात असताना आरोपींनी ‘माण साईटवर लागणारे साहित्य पुरवण्याचे काम मला का दिले नाही? तुझ्यामुळे माझे नुकसान झाले आहे, आताच्या आता एक लाख रुपये दे नाहीतर तुला जिवंत सोडणार नाही, गाडीत हत्यार ठेवले आहे.’ अशी धमकी देत एक लाख रुपयांची खंडणी मागितली.