पिंपरी, ता. ८ : भरधाव ट्रकच्या धडकेत गंभीर जखमी झालेल्या दुचाकीस्वाराचा उपचारादरम्यान मृत्यू झाला. त्रिवेणीनगर चौकात १ ऑगस्टला सायंकाळी सहाच्या सुमारास हा अपघात झाला होता. अभिजित श्रीशेल कुंचबळ (वय २४, रा. साईनाथनगर, निगडी) असे मृताचे नाव आहे. याप्रकरणी त्यांचा भाऊ आकाश यांनी निगडी पोलिस ठाण्यात फिर्याद दिली. त्यानुसार पोलिसांनी अज्ञात ट्रकचालकावर गुन्हा दाखल केला. ते तळवडे येथून साईनाथनगर येथे जात होते. पाठीमागून आलेल्या भरधाव ट्रकने त्यांच्या दुचाकीला जोरात धडक दिली. गंभीर जखमी झाल्याने त्यांच्यावर उपचार सुरू होते. सात ऑगस्टला त्यांचा मृत्यू झाला.
-----------------