पिंपरी, ता. २१ : ‘पुणे ग्रँड चॅलेंज टूर-२०२६’ या आंतरराष्ट्रीय सायकलिंग स्पर्धेचा चौथा टप्पा २३ जानेवारीला (शुक्रवार) होत आहे. यामुळे पिंपरी चिंचवड महापालिका हद्दीत स्पर्धा मार्गावरील सर्व सरकारी व खासगी शाळा २३ जानेवारी रोजी दुपारी १२ वाजेपर्यंतच सुरू ठेवाव्यात. त्यांनतर शाळा बंद राहतील, असे आदेश जिल्हाधिकारी जितेंद्र डुडी यांनी दिले आहेत.

स्पर्धेच्या टप्पा क्रमांक चार अंतर्गत छत्रपती शिवाजी स्टेडियम, बालेवाडी येथून स्पर्धेला सुरुवात होणार असून, ती पुणे शहर हद्दीत जावून परत राजीव गांधी उड्डाणपूलमार्गे पिंपरी चिंचवड आयुक्तालयाच्या हद्दीत प्रवेश करणार आहे. तेथून ती सांगवी, वाकड, निगडी, त्रिवेणीनगर, भोसरी, चिखली, पिंपरी, काळेवाडी परिसरातून फिरुन परत राजीव गांधी उड्डाणपूलमार्गे पुणे शहर हद्दीत प्रवेश करणार आहे. ही स्पर्धा सुरळीत व सुरक्षितपणे व्‍हावी, यासाठी तसेच नागरिकांची गैरसोय टाळण्यासाठी स्पर्धा मार्गावर सर्व प्रकारच्या वाहनांना प्रवेश करण्यास मनाई करण्यात आली आहे.
तसेच वाहतूक पर्यायी मार्गाने वळवण्यात आलेली आहे. विद्यार्थ्यांची होणारी गैरसोय टाळण्याकसाठी स्पर्धा मार्गावरील सांगवी, वाकड, रावेत, ताथवडे, पुनावळे, निगडी प्राधिकरण, इंद्रायणीनगर, चिंचवड एमआयडीसी, चिखली, काळेवाडी, भोसरी एमआयडीसी, यशवंतनगर पिपरी, त्रिवेणीनगर या परिसरांतील सर्व शासकीय व खासगी शाळा दुपारी १२ वाजेनंतर बंद करण्याचे आदेशात नमूद करण्यात आले आहे.