सम-विषम वाहतूक व्यवस्था हवी
दुसऱ्याही दिवशी ‘जाम’ ही बातमी वाचली (सकाळ टुडे, २६ जानेवारी). केवळ पुणे - मुंबई द्रुतगती मार्गच नाही, तर देशातील प्रत्येक रस्त्यांवर रहदारी प्रचंड प्रमाणात वाढली आहे. त्याने प्रदूषणात वाढ तर झालीच आहे. पण, अपघातांची शक्यताही वाढली आहे. त्याबरोबरीने इंधनाचा नाश, मनस्ताप आणि वेळेचा अपव्यय होतो आहे. यावर उपाय म्हणून सम-विषम वाहतूक व्यवस्था कठोरपणे लागू केली पाहिजे. या नियमानुसार, सम तारखेला सम क्रमांकाची (०,२,४,६,८) वाहने आणि विषम तारखेला विषम क्रमांकाची (१,३,५,७,९) वाहने रस्त्यावर चालवण्याची परवानगी दिली जाते. या व्यवस्थेची परिणामकारक पद्धतीने अंमलबजावणी केली तर वाहतुकीच्या बऱ्याच समस्या सुटण्यास मदत होईल. अर्थात ही अंमलबजावणी करण्यासाठी वाहनचालकांच्या उत्स्फूर्त सहकार्याची आवश्यकता आहेच.
- शिवराम वैद्य, निगडी