पिंपरी, ता. २ : एका फसवणूक प्रकरणात पत्नीवर गुन्हा दाखल झाल्याने पतीचा तिच्याशी वाद झाला. त्यानंतर आलेल्या तणावातून पतीने विष प्राशन करून आत्महत्या केली. चऱ्होलीत हा प्रकार घडला. कुमार ऐश्वर्य (वय ३९, रा. चऱ्होली बुद्रूक) असे मृताचे नाव आहे. दिघी पोलिस ठाण्याचे वरिष्ठ निरीक्षक प्रमोद वाघ यांनी दिलेल्या माहितीनुसार कुमार यांच्या पत्नी रिअल इस्टेटचे काम करतात. त्यांच्यावर ठाणे येथील एका पोलिस ठाण्यात फसवणुकीचा गुन्हा दाखल झाला आहे. त्यामुळे कुमार तणावात होते. गेल्या गुरुवारी (ता. २९) दोघांमध्ये वाद झाला. त्यानंतर कुमार यांनी विषारी औषध प्राशन केले. त्यांना त्रास होऊ लागल्याने पत्नीने त्यांना खासगी रुग्णालयात दाखल केले. उपचारादरम्यान रविवारी (ता. १) रात्री उशिरा त्यांचा मृत्यू झाला.
-----------------------