पिंपरी, ता. १७ ः महापालिकेची ‘सारथी’ प्रणाली केवळ तक्रार नोंदणीपुरती मर्यादित न ठेवता ‘स्मार्ट गव्हर्नन्स प्लॅटफॉर्म’ म्हणून विकसित करावी. तक्रारींचे जलद वर्गीकरण, निवारण, डेटा विश्लेषण जलद करून ‘ॲप’मधील त्रुटी दूर कराव्यात, असे पत्र महापौर रवी लांडगे यांनी आयुक्त डॉ. विजय सूर्यवंशी यांना दिले आहे. तक्रारींचे स्वयंचलित वर्गीकरण व योग्य विभागाकडे त्वरित पाठविणे, तक्रार निवारणापूर्वी प्रत्यक्ष पडताळणी अनिवार्य करणे, तक्रारींच्या मूळ कारणांचे विश्लेषण करून कायमस्वरूपी उपाययोजना कराव्यात, विभागनिहाय अधिकाऱ्यांची माहिती प्रणालीत समाविष्ट करावी, डेटा सुरक्षा सक्षम असावा, ३० दिवसांत कृती आराखडा आणि ६० दिवसांत सुधारित प्रणालीचा रोडमॅप सादर करावा असेही पत्रात म्हटले आहे.