पिंपळे सौदागर, ता. १८ ः पिंपळे सौदागरचे ग्रामदैवत श्री मुंजोबा महाराज यांचा वार्षिक उत्सव शनिवारी (ता. १९) अपार श्रद्धा व भक्तिभावाने जल्लोषात साजरा करण्यात आला. फुलांची उधळण करत भाविकांनी मुंजोबा महाराजांचे मनोभावे दर्शन घेतले. देवाला नैवेद्य अर्पण करून व श्रीफळ फोडून भाविकांनी साकडे घातले.
उत्सव समिती व समस्त पिंपळे सौदागर ग्रामस्थ यांच्या संयुक्त संयोजनातून यंदाही विविध धार्मिक कार्यक्रम, ढोल लेझीम स्पर्धा, भव्य पालखी मिरवणुकीचे आयोजन करण्यात आले. सोहळ्याची सुरुवात शनिवारी पहाटे सहा वाजता श्री मुंजोबा महाराज यांच्या महापूजा व अभिषेकाने झाली. सकाळी ८ वाजता माजी नगरसेवक नाना काटे, शहर उत्सव समिती अध्यक्ष संतोष काटे, पालखी समिती अध्यक्ष विलास काटे, विजय भिसे, बाळासाहेब कुंजीर, विजू काटे, मानसिंग काटे, नंदकुमार काटे व ग्रामस्थ यांच्या हस्ते पिंपळे सौदागर येथील सर्व मंदिर व देवांना पान फूल करण्यात आले.
पिंपळे सौदागर येथील विठ्ठल रुक्मिणी भजनी मंडळ, सत्यभामा भजनी मंडळ, ज्ञानाई भजनी मंडळ, गुरुमाऊली भजनी मंडळ यांच्या सुस्वर भजनी वाणीने दुपारी भाविकांना आध्यात्मिक आनंद दिला. श्री मुंजोबा महाराज मंदिरापासून सायंकाळी साडेपाच वाजता श्री मुंजोबा महाराज पालखी मिरवणुकीला सुरुवात झाली. ढोल - लेझीम पारंपरिक वाद्ये वाजवीत पालखी पुन्हा मंदिरात मोठ्या जल्लोषात परत आणण्यात आली.

गौतमी पाटील हिचा कार्यक्रम
उत्सवाच्या निमित्त नृत्यांगना गौतमी पाटील हिचा ‘नादापुढे सर्व बाद’ हा कार्यक्रम सादर करण्यात आला. त्याला ग्रामस्थांचा उत्स्फूर्त प्रतिसाद लाभला. ग्रामस्थ आणि उत्सव समितीच्या कार्यकारिणी सदस्य यावेळी उपस्थित होते.