पिंपरी, ता. २३ ः मेट्रो आणि पुणे महानगर परिवहन महामंडळ यांच्यातर्फे मेट्रो फिडर बससेवा सुरू करण्यात आली आहे. पीसीएमसी मेट्रो स्थानक ते काळेवाडी फाटा या दरम्यान ही बस (बस मार्ग क्र. ३१) धावणार असून त्यामुळे मेट्रो प्रवाशांचा प्रवास वेगवान आणि स्वस्त होणार आहे.
हा नवीन बस मार्ग काळेवाडी, रहाटणी, विजयनगर, तापकीरनगर, श्रीनगर, धनगरबाबा वस्ती, आणि ज्योतिबानगर यांसारख्या दाट लोकवस्तीच्या भागांना जोडणार आहे.
फिडर बस सेवेचा मुख्य उद्देश नागरिकांना त्यांच्या घरापासून मेट्रो स्थानकापर्यंत आणि स्थानकापासून त्यांच्या घरापर्यंत पहिली आणि शेवटची मैल कनेक्टिव्हिटी देणे हा आहे. यामुळे खाजगी वाहनांचा वापर कमी होऊन वाहतूक कोंडी आणि प्रदूषण कमी होण्यास मदत होईल, असे महामेट्रोचे व्यवस्थापकीय संचालक श्रावण हर्डीकर यांनी सांगितले.