पिंपरी, ता. २८ : महाराष्ट्र राज्य परीक्षा परिषदेमार्फत २८ डिसेंबर २०२५ रोजी घेण्यात आलेल्या राष्ट्रीय आर्थिक दुर्बल घटकांतील विद्यार्थ्यांसाठीच्या शिष्यवृत्ती परीक्षेची निवड यादी व गुण यादी जाहीर करण्यात आली आहे. ही यादी परिषदेच्या www.mscepune.in आणि http://mecenmms.in या संकेतस्थळांवर प्रसिद्ध करण्यात आली आहे. या यादीत इंद्रायणीनगर, भोसरी येथील श्री स्वामी समर्थ विद्यामंदिर शाळेतील श्रेया कलशेट्टी आणि रेणुका घुले या दोन विद्यार्थिनींची राष्ट्रीय गुणवत्ता यादीत निवड झाली आहे.
दरम्यान, शिष्यवृत्ती योजना (एनएमएमएस) परीक्षेतील विद्यार्थ्यांच्या प्राप्त गुणांची यादी २४ फेब्रुवारी रोजी जाहीर केली होती. त्यानंतर विद्यार्थ्यांना व पालकांना जात, दिव्यांगत्व, जन्मदिनांक आदी तपशिलांमध्ये दुरुस्ती असल्यास शाळेमार्फत परिषदेकडे ऑनलाइन पाठविण्याच्या सूचना देण्यात आल्या होत्या. विद्यार्थी व पालकांकडून प्राप्त दुरुस्त्यांचा विचार करून पात्र विद्यार्थ्यांची अंतिम निवड यादी प्रसिद्ध करण्यात आल्याचे परीक्षा परिषदेकडून सांगण्यात आले.
----