पिंपरी, ता. २८ : छत्रपती शिवाजी महाराज यांच्याबद्दल बागेश्वर धामचे धीरेंद्र शास्त्री यांनी केलेल्या कथित वादग्रस्त विधानाच्या निषेधार्थ पिंपरी-चिंचवड शहर काँग्रेसने तीव्र आंदोलन छेडले. शहरातही काँग्रेस कार्यकर्त्यांनी पिंपरी चौकातील भीमसृष्टी स्मारकासमोर निषेध नोंदवला. यावेळी कार्यकर्त्यांनी धीरेंद्र शास्त्री यांची प्रतीकात्मक प्रतिमा दाखवत निदर्शने केली.
आंदोलनप्रसंगी महाराष्ट्र प्रदेश काँग्रेस कमिटीचे सरचिटणीस बाबू नायर, प्रदेश सचिव संदेश नवले, महिला काँग्रेसच्या अध्यक्षा सायली नढे, शिक्षण मंडळाचे माजी सभापती विष्णुपंत नेवाळे, बारा बलुतेदार संघटनेचे पुणे जिल्हाध्यक्ष सोमनाथ शेळके, मराठा सेवा संघाचे दक्षिण भारताचे कार्याध्यक्ष प्रकाश जाधव, ओबीसी महासंघाचे नेते आनंदा कुदळे तसेच काँग्रेसचे वरिष्ठ उपाध्यक्ष नरेंद्र बनसोडे आदी उपस्थित होते. दरम्यान, छत्रपती शिवाजी महाराजांच्या सन्मानार्थ या ठिकाणी ‘शिवाजी कोण होता’ या पुस्तकाचे सामूहिक वाचन करण्यात आले.
---