अर्धवट गाणी, भरमसाठ जाहिराती : श्रोते त्रस्त
आकाशवाणी विविध भारतीच्या जाहिरात प्रसारण सेवेच्या पुणे केंद्राच्या श्रोत्यांवर जाहिरातींचा भडिमार होत आहे. सकाळी सात वाजेपासून ते दहा वाजेपर्यंत जाहिराती लागतात त्यात अधूनमधून अर्धवट सिनेसंगीत, भक्तिगीत, भावगीतही ऐकायला मिळतात. कधी कधी जाहिरातींचा ‘लोड’ एवढा असतो की गीताचे केवळ धृवपदच ऐकवण्यात येते. आकाशवाणीवर डॉक्टर किंवा हॉस्पिटलच्या जाहिरातींचे तर पेवच फुटले आहे. श्रोत्यांच्या प्रश्नांना उत्तर देण्याच्या कार्यक्रमात अनेक श्रोते जाहिरातीबाबत आणि अपूर्ण गाण्यांच्या प्रक्षेपणाबाबत तक्रारी करतात. तेव्हा ‘हे आमचे जाहिरात प्रसारण केंद्र आहे, तेव्हा जाहिराती येणारच’, असे उत्तर मिळते. ‘जाहिराती येऊ देत हो पण अर्धवट गाणी का लावता?’ या प्रश्नालाही, ‘अहो, शेवटी वेळेचे बंधन असते’ असे उत्तर दिले जाते.
- शिवराम वैद्य, निगडी