चिखली, ता. ११ : गॅस सिलिंडरच्या तुटवड्यामुळे चिखली भागांत अवैध गॅस विक्रेते आणि गॅस वितरकांच्या डिलिव्हरी बॉयकडून घरगुती ग्राहकांची लुटमार सुरू झाली आहे. चिखली, तळवडे, भोसरी एमआयडीसीमधील रोजंदारीवरील कामगारांवर उपासमारीची वेळ येऊ लागली आहे.
आखाती युद्धामुळे गॅस सिलिंडर पुरवठ्यावर परिणाम झाला असून मोठ्या प्रमाणात काळाबाजार सुरू झाला आहे.
गॅस संपल्यानंतर गॅस बुकिंग नंबर डायल केल्यास नंबर अस्तित्वात नाही, असे घरगुती ग्राहकांना ऐकवले जात आहे. डिलिव्हरी बॉयकडून नागरिकांना गॅस मिळतो. मात्र, त्यासाठी तब्बल दोन ते अडीच हजार रुपये मोजावे लागत आहेत. अनेक परप्रांतीय त्याचबरोबर तरुण मुले चिखली, तळवडे, भोसरी आणि पिंपरी एमआयडीसीमध्ये रोजंदारीवर काम करतात. त्यांच्याकडे गॅसजोड नसतो. त्यामुळे त्यांना अवैधरीत्या गॅस विक्री करणाऱ्याकडूनच गॅस विकत घ्यावा लागतो. पूर्वी अशा व्यक्तींना पाच किलो गॅससाठी ७०० ते ८०० रुपये मोजावे लागत होते. मात्र, आता त्यांना पाच किलोच्या गॅससाठी एक हजार ते दीड हजार रुपये मोजावे लागत आहेत. याबाबत मोशी तसेच चिंचवड येथील गॅस एजन्सीशी संपर्क साधला असता तो होऊ शकला नाही.

गॅस संपल्यानंतर बुकिंग करता येत नव्हते. त्याचबरोबर गॅस एजन्सीकडे चकरा मारूनही गॅस मिळाला नाही. गॅस नसल्याने उपासमारीची वेळ कुटुंबावर आली. त्यामुळे दोन दिवसांंपूर्वी २ हजार रुपये देऊन डिलिव्हरी बॉयकडून गॅस घेतला.
- रामसिंग राजपूत, चिखली

मी बॅचलर मुलांबरोबर राहतो. अवैध विक्रेत्याकडून पाच किलो गॅस भरून घेतो. मात्र त्यासाठी आता तब्बल दीड हजार रुपये मोजावे लागत आहेत.
- उमेश यादव, मोरे वस्ती