पिंपरी, ता. १० ः पिंपरी चिंचवड महापालिका निवडणुकीतील शिवसेना पक्षाच्या उमेदवारांच्या प्रचारार्थ किवळेतील सभेस उपमुख्यमंत्री एकनाथ शिंदे यांनी शुक्रवारी (ता. ९) लाइव्ह मार्गदर्शन केले. त्यामुळे शिवसेनेत उत्साहाचे वातावरण आहे. त्यांनी किवळे-रावेत-विकासनगर प्रभाग क्रमांक १६ मधील शिवसेनेचे उमेदवार बाळासाहेब ओव्हाळ, रेश्‍मा कातळे, ऐश्‍वर्या तरस, नीलेश तरस यांना विजयी करण्याचे आवाहन केले.
या निवडणुकीतील शिवसेना पक्षाच्या उमेदवारांच्या प्रचारार्थ किवळेतील मुकाई चौकात सभा आयोजित केली होती. यावेळी उद्योग मंत्री उदय सामंत यांनीही प्रभावी शब्दांत सभेला संबोधित केले. या व्यासपीठावर खासदार श्रीरंग बारणे , उपनेते इरफान सय्यद, सुलभा उबाळे, जिल्हाप्रमुख राजेश खांडभोर, उपजिल्हाप्रमुख शरद हुलावळे, पश्चिम महाराष्ट्र युवा सेना प्रमुख विश्‍वजित बारणे, जिल्हा संघटक बाळासाहेब वाल्हेकर, शहरप्रमुख नीलेश तरस, जिल्हा संघटिका शीला भोंडवे, महानगरप्रमुख राजेश वाबळे आदि उपस्थित होते.
उपमुख्यमंत्री शिंदे म्हणाले, ‘‘पिंपरी चिंचवडमध्ये भगव्या विचारांचे वादळ निर्माण झाले आहे. या भूमीत शिवसेना किंगमेकरच्या भूमिकेत आल्याशिवाय राहणार नाही. ही हिंदुह्रदयसम्राट बाळासाहेब ठाकरे यांची शिवसेना आहे. त्यांच्या विचारांशी तडजोड होणार नाही.’’
दरम्यान, प्रचारार्थ सभेला नागरिक, महिला आणि युवकांचा उस्फूर्त प्रतिसाद लाभला.
-----