सोमाटणे, ता. १३ ः नवीन वर्षाच्या पहिल्या दोन आठवड्यात मावळातील दोन वेगवेगळ्या ठिकाणी छापे टाकून दारू व्यवसाय बंद करण्यात पोलिसांना यश आले.
मावळात पोलिसांनी अवैध दारू विक्री विरुद्ध शोध मोहीम राबवणे सुरु केली आहे. ठराविक संशयित ठिकाणावर लक्ष ठेवून पेट्रोलिंग सुरु केली तर काही ठिकाणची गस्त वाढवली. पहिल्या घटनेत दारुंब्रे येथे ओढ्या काठी गावठी दारू तयार केली जात असल्याची माहिती शिरगाव पोलिसांना समजली असता, वरिष्ठ पोलिस निरीक्षक जितेंद्र कदम यांच्या मार्गदर्शनाखाली दारूभट्टीवर छापा टाकून साठ हजार
किमतीचे बाराशे लिटर गूळ मिश्रित रसायन नष्ट केले. दुसऱ्या घटनेत युनिट चारच्या पोलिस पथकांनी सुदवडी परिसरातील सुधा नदीकाठी गावठी दारूभट्टीवर छापा टाकून बावन्न हजार रुपये किमतीचे एक हजार लिटर गाळमिश्रित रसायन नष्ट केले. या दोन्ही घटनेचे आरोपी पसार झाले. पोलिसांनी अज्ञात आरोपी विरूद्ध गुन्हा दाखल केला आहे.