पिंपरी, ता. १६ : पिंपरी चिंचवड महापालिका प्रभाग क्रमांक २० मधील राष्ट्रवादी काँग्रेस शरदचंद्र पवार पक्षाच्या उमेदवाराच्या भावाने एका घरात शिरून कुटुंबातील सदस्यांना धक्काबुक्की करीत जिवे मारण्याची धमकी दिली. पिंपरीतील महेशनगर परिसरात हा प्रकार घडला. याप्रकरणी एका महिलेने संत तुकारामनगर पोलिस ठाण्यात फिर्याद दिली. त्यानुसार पोलिसांनी राजरत्न अशोक शीलवंत ऊर्फ राजू (रा. संत तुकारामनगर, पिंपरी) याच्यावर गुन्हा दाखल केला. आरोपीने फिर्यादीच्या घराबाहेरील विजेचे दिवे आणि कुंड्यांची तोडफोड केली. घराचा दरवाजा तोडून आत घुसल्यानंतर त्याने फिर्यादीच्या आजीला धक्काबुक्की केली, तसेच त्यांच्या वडिलांना जिवे मारण्याची व नोकरी घालविण्याची धमकी दिली. फिर्यादीच्या आईलाही त्याने शिवीगाळ केली. आरोपी हा उमेदवार सुलक्षणा धर यांचा भाऊ आहे. याप्रकरणी संत तुकारामनगर पोलिस अधिक तपास करीत आहेत.
------------------