इंस्टावरील संपर्काद्वारे पिस्तूल विकणारा अटकेत
पिंपरी, ता. २१ : इंस्टाग्रामवरून ओळख करून पिस्तूल विक्री करणाऱ्या नांदेड येथील एकाला दोन पिस्तूल व दोन काडतुससह पिंपरी चिंचवड पोलिसांच्या मालमत्ता गुन्हे विरोधी पथकाने अटक केली. ही कारवाई भोसरीतील गावजत्रा मैदान येथे करण्यात आली. मंगेश मालू कोकणे (रा. मुगाव, ता. नायगाव, नांदेड) असे या आरोपीचे नाव आहे. नांदेड येथील रहिवासी असलेला एम.के. नावाचा आरोपी हा पिस्तूल विक्री करीत असून तो इंस्टाग्रामद्वारे संपर्क करून पिस्तूल विक्रीचा व्यवसाय करीत असल्याची माहिती पोलिस पथकाला मिळाली. त्यानुसार पोलिसांनी तांत्रिक तपास व गोपनीय माहितीच्या आधारे भोसरीतील गावजत्रा मैदान येथून कोकणे याला ताब्यात घेतले. त्याच्याकडून एक लाख दोन हजार रुपये किमतीचे दोन पिस्तूल व दोन काडतूस जप्त केले.