सांगली : कुपवाड येथील मनीषा व मोहन केसरेकर या दाम्पत्याच्या निर्घृण हत्येच्या निषेधार्थ सकल हिंदू समाजाच्या वतीने आज (ता. २१) सांगली व कुपवाड शहरात बंद ठेवण्यात येणार आहे. दुपारी चार वाजता शिवतीर्थावरील छत्रपती शिवाजी महाराज यांच्या पुतळ्यापासून महापालिकेपर्यंत निषेध मोर्चा काढण्यात येणार आहे. संशयित फरीद शेख याच्यावर फास्ट ट्रॅक न्यायालयात खटला चालवावा आणि त्याला फाशीची शिक्षा व्हावी, अशी मागणी केली. तसेच या खटल्यासाठी विशेष सरकारी वकील म्हणून हर्षद निंबाळकर यांची नियुक्ती करावी आणि मृत दांपत्याची मुले व साक्षीदारांना तत्काळ पोलिस संरक्षण द्यावे, या मागण्यांसाठी हा मोर्चा असेल, असे आमदार गोपीचंद पडळकर यांनी सांगितले. मोर्चास शिवप्रतिष्ठान युवा हिंदुस्थानचे अध्यक्ष नितीन चौगुले, आमदार संग्राम जगताप, महेश लांडगे, सुधीर गाडगीळ व सुरेश खाडे उपस्थित राहणार आहेत.
