पिंपरी, ता. ५ ः देहूरोड ते तळेगावच्या दरम्यान मालगाडीचे इंजिन खराब झाल्यामुळे सोमवारी (ता. ५) पुणे - लोणावळा मार्गावर रेल्वे सेवा विस्कळीत झाली. मुंबईच्या दिशेने जाणाऱ्या एक्स्प्रेस आणि लोकल सुमारे तीन तास खोळंबल्या. परिणामी, प्रवाशांना मनस्ताप सहन करावा लागला. सायंकाळी पावणेसहाच्या सुमारास दुसरे इंजिन लावून मालगाडी बाजूला केल्यानंतर रेल्वे सेवा सुरळीत झाली.
मुंबईच्या दिशेने जाणाऱ्या मालगाडीचे इंजिन सोमवारी दुपारी साडेतीनच्या सुमारास तळेगाव रेल्वे स्थानकाजवळ बंद पडले. त्याचा पुणे-लोणावळा आणि एक्स्प्रेस गाड्यांच्या संचलनावर परिणाम झाला. या मार्गावरुन जाणारी दुपारी तीनची लोकल, डेक्कन एक्स्प्रेस, इंदूर एक्स्प्रेस, नागरकोईल एक्स्प्रेस, दुपारी ३.४७ ची तळेगाव लोकल, कोयना एक्स्प्रेस, उद्यान एक्स्प्रेस, सायंकाळी ४.२५ आणि ५.२० ची लोणावळा लोकल देहूरोड ते शिवाजीनगर दरम्यान रेल्वे थांबविण्यात आल्या. पुणे-लोणावळा दरम्यान एक अप आणि एकच डाऊन लाइन असल्यामुळे या सर्व रेल्वे थांबवण्याशिवाय रेल्वे प्रशासनाकडे दुसरा पर्याय नव्हता. लोकल आणि एक्स्प्रेस गाड्यांना उशीर झाल्यामुळे कामगार, विद्यार्थी आणि प्रवाशांना इच्छितस्थळी पोहोचण्यास उशीर झाला. पुणे-लोणावळा लोकल दुपारी १२ ते ३ पर्यंत बंद आहेत. त्यानंतर धावणारी तीनची पहिली लोकलही मालगाडीच्या इंजिन बिघाडामुळे मध्येच थांबल्यामुळे त्यातील विद्यार्थी आणि प्रवाशांना नाहक मनस्ताप सहन करावा लागला. सायंकाळी पावणे सहाच्या सुमारास लोणावळ्यावरुन दुसरे इंजिन आल्यानंतर मालगाडी बाजूला करुन रेल्वे सेवा पूर्ववत करण्यात आली. तीन तासांनी रेल्वे सेवा सुरू झाल्यानंतर प्रवाशांनी सुटकेचा निःश्‍वास सोडला.