पिंपरी, ता. १४ ः ‘एक्काम् अद्वितीयम् इव्हेंट्स अँड एक्झिबिशन कंपनी’ने पुण्यातील ‘एनराईज बाय सयाजी’ येथे आयोजित पहिले जीवनशैली प्रदर्शन यशस्वी झाले. यात स्टार्टअप्स, उद्योजक, कलाकार आणि सामाजिक संस्थांनी उत्साहाने सहभाग घेतला. केवळ व्यावसायिक नफा न पाहता एका विशिष्ट उद्देशाने प्रेरित व्यासपीठ म्हणून ‘एक्काम्’ने आपली वेगळी ओळख निर्माण केली आहे.
राष्ट्र उभारणीची संकल्पना हे ‘एक्काम् अद्वितीयम्’चे वेगळेपण आहे. स्टार्टअप्सना आधार देणारी, नवीन ब्रँड्सना व्यासपीठ मिळवून देणारी आणि स्वयंसेवी संस्थांना प्रोत्साहन देऊन सामाजिक कार्याला गती देणारी चळवळ आहे. सुरत येथील बांधकाम व्यावसायिक रमेश पटेल, वाकडचे नगरसेवक विनायक गायकवाड आणि ममता गायकवाड यांच्या उपस्थितीत उद्‍घाटन झाले. दिव्यांग उद्योजकांना आपली कला, सर्जनशीलता आणि कौशल्ये मांडण्याची संधी मिळाली. सक्षमीकरण, समानता आणि सामाजिक एकात्मतेप्रति ‘एक्काम्’ची कटिबद्धता दिसून आली. डी. वाय. पाटील स्कूल ऑफ डिझाइनचे विभागप्रमुख डॉ. नामदेव पाटील, साहाय्यक प्राध्यापक अनिकेत सासे यांचा सन्मान केला. ‘इकोसर्व्ह’च्या संस्थापक डॉ. आनंदिता उपस्थिती होत्या. ‘रूट स्किल्स’च्या संस्थापक सुश्री भविषा बुद्धदेव ‘ग्रीन स्किल पार्टनर’ होत्या. व्यवसाय वृद्धी, नावीन्य, सर्वसमावेशकता आणि सामाजिक जबाबदारी या उद्दिष्टांसाठी नीलेश झवेरी, अनुपमा सिंग, पंकजा धोबे आणि पूजा शर्मा यांनी ‘एक्काम् अद्वितीयम्’ची स्थापना केली आहे.
---