तळेगाव दाभाडे, ता. २४ ः घशाच्या कर्करोगावर यशस्वी मात करत ७४ वर्षीय रुग्णाने पुन्हा आवाज मिळवला आहे. तळेगाव दाभाडे येथील खासगी रुग्णालयांत त्यांनी उपचार घेतले. आधुनिक प्रिसिजन ऑन्कोलॉजी उपचार पद्धतीमुळे त्यांचे स्वरयंत्र वाचविण्यात डॉक्टरांना यश आले आहे. यामुळे कर्करोगावर यशस्वी मात करता येऊ शकते, हा सकारात्मक संदेश मिळाला आहे. रुग्णाला तंबाखूचे व्यसन होते. त्यांचा आवाज हळूहळू बसला. मानेच्या उजव्या बाजूला वेदनारहित गाठ दिसून आली. तीन महिन्यांत आवाज अधिकच कमजोर झाला. थोडे बोलले तरी त्यांना थकवा येऊ लागला. सतत आवाज बसणे, गिळताना त्रास होणे आणि मानेवर सूज अशी लक्षणे होती. तपासणीत कर्करोग असल्याचे आढळून आले. त्यांच्यावर आधुनिक हेलिकल टोमोथेरपी आणि सिस्प्लॅटिन केमोथेरपी उपचार यशस्वी झाले. स्वरयंत्राचे जतन करण्यासोबतच कर्करोगावर संपूर्ण नियंत्रण मिळविले. उपचारानंतर १६ आठवड्यांत रुग्णाचा आवाज स्पष्ट झाला.
---