पिंपरी, ता. २६ ः राष्ट्रीय विज्ञान दिनानिमित्त पिंपरी चिंचवड सायन्स पार्क व कल्पकघर यांच्या संयुक्त विद्यमाने २७ फेब्रुवारी ते २ मार्च दरम्यान विविध विज्ञान विषयक कार्यक्रमांचे आयोजन करण्यात आले आहे.
या दरम्यान शिक्षक आणि विद्यार्थ्यांसाठी हॅकेथॉनसह विविध स्टेम स्पर्धा, विद्यार्थी आणि शिक्षकांचे स्टेम मॉडेल प्रदर्शन, लोकप्रिय विज्ञान आणि तंत्रज्ञानावरील शास्त्रज्ञांची व्याख्याने आणि विज्ञानविषयक प्रात्यक्षिके अशा विविध कार्यक्रमांचे आयोजन करण्यात आले आहे. इयत्ता ५ वी ते १० वीच्या विद्यार्थ्यांसाठी विशेष रोबोटिक्स व कोडिंग एंगेजमेंट सेशन आयोजित करण्यात आले आहे. हा एक तासाचा विनामूल्य उपक्रम असून मर्यादित प्रवेशाच्या तत्त्वावर नोंदणी केली जाणार आहे. पिंपरी चिंचवड सायन्स पार्क व तारांगण येथे हे कार्यक्रम होणार आहेत. विद्यार्थी व प्रेक्षकांनी या उपक्रमांसाठी अधिकाधिक संख्येने सहभागी होऊन कार्यक्रमांचा लाभ घ्यावा, असे आवाहन सायन्स पार्कच्यावतीने करण्यात आले आहे.