पिंपरी, ता. २६ : पिंपरी चिंचवड पोलिस आयुक्तालयाच्या हद्दीतून सन २०१८ ते २० फेब्रुवारी २०२६ या कालावधीत अठरा वर्षांखालील २८६ बालके हरवल्याची नोंद पोलिसांनी केली आहे. या बालकांचा शोध घेण्यासाठी ‘ऑपरेशन मुस्कान’ राबविण्यात आले. यापैकी १२१ बालके शोधण्यात पोलिसांना यश आले.
हरवलेल्या १८ वर्षांखालील मुला-मुलींचा शोध घेण्यासाठी २० जानेवारी ते २० फेब्रुवारी २०२६ या कालावधीत राज्यात ‘ऑपरेशन मुस्कान-१४’ ही विशेष मोहिम राबवण्यात आली. पिंपरी चिंचवडमध्येही हा तपास करण्यात आला. या मोहिमेच्या अनुषंगाने सन २०१८ ते २० जानेवारी २०२६ या कालावधीतील गुन्ह्यांचा आढावा घेतला असता एकूण २१४ बालके (३० मुले आणि १८४ मुली) हरवल्याची नोंद होती. दरम्यान, पिंपरी चिंचवड पोलिसांनी या मोहिमेत ७१ बालकांचा (११ मुले आणि ६० मुली) शोध घेऊन त्यांना त्यांच्या पालकांच्या ताब्यात दिले. तसेच मोहिमेच्या प्रत्यक्ष कालावधीत म्हणजेच २० जानेवारी ते २० फेब्रुवारी २०२६ या कालावधीत हरवलेल्या ७२ बालकांपैकी ५० बालकांचा (१६ मुले आणि ३४ मुली) शोध घेण्यात आला.