पिंपरी, ता. २६ : ‘‘निगडी येथील दुर्गादेवी टेकडीवरील दहा एकर रिकाम्या जागेत देशी वृक्ष लावून ऑक्सिजन पार्क उभारावे. त्याला स्वर्गीय गोपीनाथ मुंडे यांचे नाव द्यावे,’’ अशी मागणी महापौर रवी लांडगे यांनी पर्यावरणमंत्री पंकजा मुंडे यांच्याकडे केली आहे. मात्र, ऑक्सिजन पार्कच्या निमित्ताने टेकडीचे नामांतर करण्याचा घाट भाजपने घातला असल्याचे एका कार्यकर्त्याचे पत्र ‘व्हायरल’ झाल्याने नव्या चर्चेला तोंड फुटले आहे.

निगडीजवळील ८५ एकरावर ही टेकडी विस्तारली आहे. त्यावर महापालिकेने उद्यान विकसित केले आहे. त्याला दिवंगत पंतप्रधान इंदिरा गांधी यांचे नाव दिले आहे. दुर्गादेवी मंदिरामुळे दुर्गादेवी नावानेही ही टेकडी ओळखली जाते. या जागेत ‘स्वर्गीय गोपीनाथ मुंडे ऑक्सिजन पार्क’ उभारण्याचा प्रस्ताव महापौर रवी लांडगे यांनी मुंडे यांची भेट घेऊन सादर केला आहे. यामुळे नामांतराच्या राजकारणाची चर्चा पुन्हा रंगली आहे. पर्यावरणाच्या नावाखाली काँग्रेसकालीन प्रतीके हटवून भाजपशी संबंधित नाव पुढे आणण्याचा प्रयत्न होत असल्याचा आरोपही केला जात आहे. विशेष म्हणजे, भाजपचेच कार्यकर्ते सचिन काळभोर यांनी यासंदर्भात पत्र प्रसारित केल्याने चर्चेला उधाण आले आहे. त्यांनी म्हटले आहे की, ‘‘दुर्गा देवी टेकडी नाव ५० वर्षांपासून परिचित असल्याने नाव रद्द करू नये.’’

दुर्गादेवी टेकडीवर दहा एकर जागा रिकामी आहे. तिथे ऑक्सिजन पार्क उभारून स्वर्गीय गोपीनाथ मुंडे यांचे नाव देण्याचा प्रस्ताव दिला आहे. टेकडीचे मूळ नाव जुनेच राहील.
- रवी लांडगे, महापौर, पिंपरी चिंचवड