पिंपरी, ता. १० : दिवसा घरफोडी करून सोन्याचे दागिने चोरणाऱ्या महिलेला पिंपरी चिंचवड पोलिसांच्या गुन्हे शाखा युनिट एकच्या पथकाने अटक केली. तिच्याकडून आठ लाख रुपये किमतीचे सोन्याचे दागिने जप्त केले आहेत. सुमन दत्ता लोंढे (रा. रामनगर, वारजे माळवाडी) असे अटक केलेल्या आरोपी महिलेचे नाव आहे. सांगवी पोलिस ठाण्यात दाखल असलेल्या घरफोडीच्या गुन्ह्याचा तपास गुन्हे शाखा युनिट एकचे पथक करीत असताना पोलिसांनी सांगवी ते वारजे माळवाडी परिसरातील दोनशे ते अडीचशे सीसीटीव्ही फुटेजची पाहणी केली. यामध्ये हा गुन्हा लोंढे हिने केल्याचे निष्पन्न झाले. त्यानुसार पोलिसांनी तिला ताब्यात घेतले. तिच्याकडे अधिक तपास केला असता तिने दोन घरफोडी केल्याची कबुली दिली. त्याप्रमाणे सांगवी पोलिस ठाण्यातील गुन्हाही उघडकीस आला. बरेचसे लोक बाहेरगावी जाताना घराच्या बाहेर चावी ठेवून जात असतात हे तिने पाहिलेले होते. त्यानुसार या चावीचा शोध घेऊन या घरफोड्या तिने केल्याचे तपासात निष्पन्न झाले.
---