पिंपरी, ता. २४ : ‘‘पिंपरीगाव परिसरातील शरदनगर गल्ली क्रमांक चारमध्ये दूषित पाणीपुरवठा होत आहे. या गढूळ पाण्यामुळे परिसरात नागरिकांचे आरोग्य धोक्यात आले आहे. प्रशासनाने याकडे त्वरित लक्ष द्यावे,’’ अशी मागणी स्थानिक रहिवाशांकडून होत आहे.

या परिसरातील मुख्य जलवाहिनीमध्ये सांडपाण्याची वाहिनी (ड्रेनेज लाइन) गळती होऊन पाणी मिसळले असल्याचा संशय नागरिकांनी व्यक्त केला आहे. हे दूषित पाणी पिल्याने आजार होण्याचा धोका निर्माण झाला आहे. स्थानिक नागरिकांनी या गंभीर समस्येबाबत महापालिकेच्या संबंधित पाणीपुरवठा विभागाकडे आणि प्रभाग कार्यालयाकडे अनेकदा तोंडी व ऑनलाइन तक्रारी केल्या आहेत. मात्र, अद्याप प्रशासनाकडून कोणतीही ठोस कारवाई किंवा जलवाहिनी दुरुस्ती करण्यात आलेली नाही, असे नागरिकांनी सांगितले.

आम्ही नियमित पाणीपट्टी भरतो, तरीही आम्हाला पिण्यासाठी दूषित. पाणी पुरवले जात आहे. पाण्याला इतकी दुर्गंधी आहे की ते वापरणेही कठीण झाले आहे. महापालिकेने तातडीने जलवाहिनीची तपासणी करून दुरुस्ती करावी.
- नितीन चव्हाण, स्थानिक रहिवासी