सोमाटणे, ता. २० ः वनविभागाने घोरावडेश्वर डोंगर व तळेगाव उद्यान सामाजिक संस्थांच्या मदतीने १२ हजार वृक्षांची लागवड करून हरित करण्याचा संकल्प सोडला आहे.
या डोंगरावर भाविक, पर्यटक व ट्रेकरची मोठी वर्दळ असते. दर शनिवार, रविवार व सुट्टीच्या दिवशी मंदिर परिसराला भेट देणाऱ्यांची संख्या वाढते. त्यांना चांगल्या सुविधा मिळाव्या, शुद्ध हवेतील पर्यटनाचा आनंद घेता यावा हा यामागील उद्देश आहे. डोंगराच्या उभ्या चढणीवर तसेच मंदिराच्या बाजूला असलेल्या वृक्षांची संख्या कमी झाली आहे. ती पुर्ववत करण्याचा निर्धार वनविभागाने केला आहे. येत्या पावसाळ्यात सामाजिक संस्था, संघटनांची मदत घेऊन वृक्ष लागवड व जोपासनेचे उद्दिष्ट पूर्ण केले जाईल.

वणवा पेटवल्यास कारवाई
दरम्यान, शिरोता वनपरिक्षेत्र अधिकारी सोमनाथ ताकवले, वडगाव वनपरिक्षेत्र अधिकारी प्रकाश शिंदे यांनी सांगितले की, वणव्यामुळे जंगलाचे नुकसान होते. त्यामुळे जंगल वाचवण्यासाठी वणवे लावणाऱ्यांवर कठोर कारवाई करण्यासाठी वनविभाग दक्ष झाला आहे. आरोपी सापडल्यास तात्काळ गुन्हा दाखल करण्याचा आमचा निर्धार आहे. नागरिकांनीही जंगलसंपत्ती वाचवण्यासाठी सहकार्य करावे. वणवा पेटलेला दिसताच वनविभागाशी संपर्क साधावा.
-----