सकाळ वृत्तसेवा
पिंपरी, ता. २५ ः भरधाव वेगाने जाणाऱ्या क्रेटा मोटारीने दोन वाहनांना धडक दिली. यामध्ये पाच जण जखमी झाले. बुधवारी (ता. २५) सायंकाळी पाच वाजेच्या सुमारास मोरवाडीतील पिंपरी आयुक्त बंगल्याजवळील बजाज कॉलनीसमोर हा अपघात झाला.
सद्दाम सिकंदर अत्तार (वय २७) शकील मुबारक अत्तार (२४), मोइदीन मुबारक अत्तार (३३, सर्व रा. मोरवाडी), साहिल मणियार (२२, रा. जामखेड, जि. अहिल्यानगर), अमित काटे अशी जखमींची नावे आहेत. काटे मित्रासह मोरवाडीतून केएसबी चौकाकडे किया मोटारीतून जात होते. आयुक्त बंगल्याजवळ त्यांना अचानक मोरवाडीतील एक काम आठवले. त्यामुळे ते बजाज कॉलनीतील पंचर मधून यू टर्न घेत होते. यावेळी केएसबी चौकाकडून भरधाव वेगात आलेल्या क्रेटाने कियाला एका बाजूने जोरात धडक दिली. यात काटे गंभीर जखमी झाले, तर त्यांच्या मित्राला किरकोळ दुखापत झाली आहे. क्रेटाने नंतर पुढे बँकेची रोकड नेणाऱ्या व्हॅनला धडक दिली. ही धडक इतकी भीषण होती कि ही ३५०० किलो व्हॅन पुढे ५० ते ६० फूट जाऊन भिंत आणि दुसऱ्या व्हॅनच्या मध्ये अडकली. क्रेटामधून सद्दाम, साहिल, शकील, मोईद्दीन हे चौघे जात होते. ते गंभीर जखमी झाले. अपघाताची माहिती मिळताच संत तुकाराम नगरचे पोलीस ठाण्याचे निरीक्षक गोरख कुंभार यांनी पथकासह घटनास्थळी धाव घेतली. पाचही जखमींना खाजगी रुग्णालयात दाखल करण्यात आले. अपघातग्रस्त वाहने हटवून वाहतूक सुरळीत करण्यात आली.
-----