पिंपरी, ता. १० : पोलिस शिपाई भरती प्रक्रियेत काही उमेदवारांनी क्रीडा विभागाची बनावट प्रमाणपत्रे सादर केल्याचा आरोप मानवी हक्क संरक्षण व जागृती या संस्थेने केला आहे. या प्रकरणाची सखोल चौकशी करून दोषींवर कठोर कायदेशीर कारवाई करण्याची मागणीही या संस्थेने पोलिस आयुक्त विनयकुमार चौबे यांच्याकडे निवेदनाद्वारे केली आहे.
या निवेदनावर संस्थेचे शहराध्यक्ष श्रीकांत जोगदंड, उपाध्यक्ष काळुराम लांडगे, सचिव गजानन धाराशिवकर, कार्याध्यक्ष मुरलीधर दळवी यांच्या स्वाक्षऱ्या आहेत. दरम्यान, अद्याप कागदपत्रांची पडताळणी व्हायची आहे. त्यामध्ये काही गैर आढळल्यास संबंधितांवर रीतसर कारवाई केली जाईल, असे पोलिस उपायुक्त गणेश इंगळे यांनी सांगितले.