पिंपरी, ता. ३ ः पोलिस शिपाई, चालक पदाच्या भरतीकरिता अर्जदारांसाठी पाच आणि सहा मार्च रोजी भोसरी येथील केंद्रीय रस्ते चालक प्रशिक्षण व संशोधन संस्थेमध्ये (आयडीटीआर) वाहन चालविण्याची कौशल्य चाचणी होणार आहे. त्यामुळे नियमित वाहन चालक परवाना चाचणी दुपारी १२ नंतर सुरू होईल. हे लक्षात घेऊन वाहन चालकांनी लवकर येऊन ‘आयडीटीआर’ मध्ये गर्दी करु नये, असे आवाहन पिंपरी चिंचवड प्रादेशिक परिवहन कार्यालयामार्फत करण्यात आले आहे.
पिंपरी चिंचवड आरटीओत दररोज शिकाऊ आणि नूतनीकरण असे दोन्ही मिळून सरासरी ४०० ते ४५० हून अधिक वाहन चालक परवाना चाचणीसाठी ऑनलाइन अर्ज करतात. पक्के परवाने प्राप्त करण्याकरिता पिंपरी चिंचवड प्रादेशिक परिवहन कार्यालयाकडून ‘आयडीटीआर’ येथे मोटारसायकल विथ गिअर, मोटारसायकल विदाऊट गिअर, ऑटो रिक्षा तसेच पुनर्चाचणी परीक्षा व मोटार चालविण्याची चाचणी परीक्षा घेतली जाते. पुणे पोलिस अधीक्षक यांच्या आस्थापनेवरील रिक्त पोलिस शिपाई, चालक पदांच्या जागांकरिता सकाळच्यावेळेत कौशल्य चाचणी होणार आहे.