पिंपरी, ता. ८ : एसटी बसने प्रवास करत असलेल्या कर्मचाऱ्याला अचानक भोवळ आली. वल्लभनगर आगारातील सुरक्षारक्षक आणि प्रशासनाच्या तत्परतेमुळे संबंधित कर्मचाऱ्याला तत्काळ मदत मिळाली.
रत्‍नागिरी जिल्ह्यातील माखजन-संगमेश्वर येथून येणारी बस (एमएच १४ बीटी ४६८६) शुक्रवारी (ता. ६) दुपारी साडेतीनच्या सुमारास पिंपरी चिंचवड आगारात दाखल झाली. यावेळी प्रवास करत असलेले कर्मचारी सचिन किरतकर्वे यांना भोवळ आली. यामुळे सहप्रवासी आणि चालक-वाहक काही वेळासाठी गोंधळले. ही बाब आगारातील सुरक्षारक्षकांच्या लक्षात आली. या वेळी उत्तम यादव, राम श्रीमंगले, आकाश मार्के, पंढरीनाथ खोपडे यांनी सचिन यांना मोकळ्या वातावरणात आणून प्राथमिक मदत केली. यामुळे काही वेळातच किरतकर्वे यांची प्रकृती स्थिर झाली. त्यानंतर निगडी येथील त्यांच्या कुटुंबीयांना संपर्क करून बोलावण्यात आले. अधिक उपचारासाठी त्यांना रुग्णालयात दाखल करण्यात आले.