पिंपरी, ता. ७ : महापालिका निवडणूक कामकाज व्यवस्थित पार पाडण्यासाठी आयुक्त तथा निवडणूक अधिकारी श्रावण हर्डीकर यांनी बुधवारी (ता. ७) इंद्रायणीनगर ‘क’ क्षेत्रीय कार्यालय, ‘इ’ क्षेत्रीय कार्यालय तसेच ‘ह’ क्षेत्रीय कार्यालय येथे ईव्हीएम (इलेक्ट्रॉनिक व्होटिंग मशीन) आणि स्ट्राँग रूमची पाहणी केली. या यंत्रांच्या सुरक्षेबाबत काटेकोर नियोजन करा, अशा सूचना त्यांनी दिल्या.
यावेळी अतिरिक्त आयुक्त विजयकुमार खोराटे, मुख्य अभियंता प्रमोद ओंभासे, निवडणूक विभागाचे उपायुक्त सचिन पवार, निवडणूक निर्णय अधिकारी तथा उपजिल्हाधिकारी हिम्मत खराडे, डॉ. दीप्ती सूर्यवंशी, डॉ. अर्चना पठारे, क्षेत्रीय अधिकारी अजिंक्य येळे, तानाजी नरळे, पूजा दूधनाळे, सहाय्यक आयुक्त किरणकुमार मोरे, कार्यकारी अभियंता शिवराज वाडकर, सोहम निकम, सतीश वाघमारे उपस्थित होते.
हर्डीकर यांनी यावेळी मतमोजणीसाठी लावण्यात येणाऱ्या टेबलांची व्यवस्था तसेच त्या अनुषंगाने तयार करण्यात आलेले नकाशे यांची तपासणी केली. यासोबतच सुरक्षा व्यवस्था, सीसीटीव्ही व्यवस्था आणि मॉकपोल प्रक्रियेचीही माहिती घेतली.