पवनानगर ः पुणे ग्रॅंड टूर सायकल स्पर्धकांचे जल्लोषात स्वागत करण्यासाठी गावागावातील नागरिकांनी पारंपरिक वेशभूषा केली होती. ढोल-ताशाच्या गजरात रस्त्यांच्या दुतर्फा उभे राहून टाळ्यांचा कडकडाट संपूर्ण परिसरात आनंदी व क्रीडामय वातावरण निर्माण झाले. प्राथमिक आणि माध्यमिक शाळांतील विद्यार्थ्यांना स्पर्धकांच्या स्वागताचे फलक झळकावले. जवण, तिकोना, ठाकूरसाई, ब्राम्हणोली, काले, पवनानगर, येळसे, कडधे, आर्डव, थुगाव,
मळवंडी ढोरे व शिवणे ग्रामपंचायतीच्या वतीने चौकाचौकात मंडप टाकण्यात आले होते. आरोग्य विभाग, महसूल विभाग व पोलिस प्रशासनाने जय्यत तयारी केली होती. स्पर्धेमुळे युवकांमध्ये सायकलिंग व आरोग्याबाबत सकारात्मक संदेश पोहोचत असून क्रीडासंस्कृतीला चालना मिळत असल्याचे नागरिकांनी सांगितले. अनेक ठिकाणी ग्रामस्थ, विद्यार्थी, युवक-युवती आणि महिला वर्गाने मोठ्या संख्येने सहभाग नोंदवत स्पर्धकांना प्रोत्साहन दिले.
पुणे ग्रॅंड टूर सायकल स्पर्धा ही शिस्त, सहनशक्ती आणि पर्यावरणपूरक वाहतुकीचा संदेश देणारी असून गावोगावी झालेल्या या उत्स्फूर्त स्वागतामुळे स्पर्धकांमध्येही नवचैतन्य निर्माण झाले आहे.
---