सकाळ इम्पॅक्ट

रावेत, ता. १२ : रावेत परिसरातील नागरिकांच्या दीर्घकाळच्या मागणीला अखेर यश मिळाले आहे. पिंपरी चिंचवड महापालिकेने सद्‍गुरु चौक ते श्रीराम चौक या महत्वाच्या रस्त्याचे डांबरीकरण सुरू केले आहे.
गेल्या काही महिन्यांपासून या रस्त्याची वाईट अवस्था झाली होती. मोठमोठे खड्डे, पाणी साचल्याने वाहनचालकांची कसरत करावी लागत होती. ‘सकाळ’ने त्याबाबत वृत्त प्रसिद्ध केल्यानंतर प्रशासनाने तत्काळ कारवाई करत रस्त्याचे डांबरीकरण केले.
स्थानिक नागरिक संतोष हंडुरे म्हणाले, ‘‘सद्‍गुरु चौक ते श्रीराम चौक हा रस्ता रोज हजारो नागरिक वापरतात. शाळा, महाविद्यालय, बाजारपेठ आणि सोसायट्यांसाठी हा मुख्य रस्ता आहे. ‘सकाळ’ने या प्रश्नात लक्ष घातल्यामुळे प्रशासन हलले आणि कामाला गती मिळाली.’’
स्थानिक नागरिक प्रिया खेडकर म्हणाल्या, ‘‘दररोज मुलांना शाळेत नेताना वाहन चालवणे कठीण झाले होते. आता डांबरीकरण सुरू झाल्याने दिलासा मिळाला आहे. नागरिकांचा त्रास कमी झाला हे मोठे समाधान आहे.’’