रावेत, ता.२ ः रावेतमधील भोंडवे वस्तीत अंतर्गत रस्त्यांची अवस्था दिवसेंदिवस गंभीर होत आहे. अनेक वर्षांपासून रस्त्यांच्या दुरुस्तीचे काम प्रलंबित असून खड्डेमय रस्ते, खचलेल्या जागा आणि उघड्या नाल्यांमुळे नागरिक त्रस्त झाले आहेत. तरीही पालिका प्रशासनाकडून कोणतीही ठोस कारवाई अद्याप झालेली नसल्यामुळे नागरिकांमध्ये तीव्र नाराजी व्यक्त केली जात आहे.
रावेत परिसर वेगाने विकसित होत आहे. भोंडवे वस्ती भागांतही नवीन बांधकामे प्रचंड वेगाने झाल्यानंतरही पायाभूत सुविधांकडे महापालिकेचे दुर्लक्ष झाले आहे. भोंडवे वस्तीतील अंतर्गत रस्त्यांवर पावसाळ्यात वाहने चालवणे तर सोडाच, पायी चालणेही कठीण झाले होते. चिखल आणि साचलेल्या पाण्यामुळे नागरिकांना घराबाहेर पडणेही अवघड झाले होते.
काही ठिकाणी सिमेंट रस्त्याचे काम सुरू होईल असे सांगण्यात आले; मात्र प्रत्यक्षात काहीच हालचाल दिसून येत नाही.
रस्त्यांची अवस्था इतकी वाईट आहे की, दुचाकी वाहने घसरून अपघात होण्याची भीती कायम असते. अनेक वेळा तक्रारी करूनही काम होत नाही. निवडणुकांच्यावेळी आश्वासने देतात, पण नंतर विसरतात. स्थापत्य विभागाच्या अधिकाऱ्यांकडे अनेकदा तक्रारी करुनही समस्या सोडविण्यासाठी कोणतेही प्रयत्न केले जात नसल्याचा आरोप स्थानिक नागरिक करत आहेत.