रावेत, ता. ३ ः संविधान दिनानिमित्त अमेरिकन इंडियन फाउंडेशन, नवी दिल्ली यांच्या आर्थिक साक्षरता उपक्रमांतर्गत माध्यमिक विद्यालय केशवनगर भाग शाळा, रावेत येथील विद्यार्थ्यांना प्रत्यक्ष बँकिंग व्यवहारांचे प्रशिक्षण देण्यात आले. या उपक्रमाचा एक भाग म्हणून विद्यार्थ्यांनी आयडीबीआय बँकेत शैक्षणिक भेट दिली.
या भेटीचे मार्गदर्शन अमेरिकन इंडियन फाउंडेशनच्या शिक्षिका पूजा भोसले आणि रावेत शाळेच्या शिक्षिका प्रज्ञा उके यांनी केले. विद्यार्थ्यांना बँकेत चालणारे दैनंदिन कामकाज प्रत्यक्ष पाहण्याची आणि समजून घेण्याची संधी मिळाली. खाते उघडणे, पैसे जमा करणे व काढणे, एफडी-आरडी प्रक्रिया, विविध प्रकारची कर्जे, तारण व्यवस्था, एनईएफटी-आरटीजीएस असे सर्व व्यवहार विद्यार्थ्यांना समजावून सांगण्यात आले. बँकेचे शाखा व्यवस्थापक विभोर पारीख, मेनका कुमारी, अतुल सिंग, अलका भगवत आणि उदय पवार यांनी विद्यार्थ्यांना आधुनिक बँकिंग, डिजिटल व्यवहार, ऑनलाइन पेमेंट्समध्ये असलेले धोके आणि त्यावरील उपाय याबाबत माहिती दिली. या शैक्षणिक भेटीत इयत्ता नववीचे विद्यार्थी, मुख्याध्यापक रामेश्वर पवार तसेच शिक्षक पूजा रोकडे, महेंद्र वानखेडे, आरशिया शेख, कृत्तिका सूर्यवंशी आदी उपस्थित होते.