शिरगाव ता. २५ : उपविभागीय कृषी विभागाने नुकताच मावळ तालुक्यात खरीप हंगाम पाहणी दौरा केला. यामध्ये त्यांनी विविध योजनांचा लाभ मिलेलेल्या शेतकऱ्यांशी संवाद साधत मार्गदर्शन केले.
मावळात खरीप हंगाम महत्त्वाचा असतो. मावळ तालुक्यात भात पीक मुख्य असल्याने उपविभागीय कृषि अधिकारी पुणे सुनील जाधव यांनी पीक पाहणीसाठी पवन मावळची निवड केली. सांगवडे येथे शेतकरी कृष्णा जगताप यांना दिलेल्या ट्रॅक्टरची तपासणी करून मार्गदर्शन केले. या योजने अंतर्गत लाभार्थी शेतकऱ्यास सव्वा लाख रुपये अनुदान देण्यात आले आहे.
सध्या कृषि विभागामार्फत खरीप हंगामातील मोहीम राबवणे सुरू असून, या अंतर्गत सांगवडे येथे पाणी फाउंडेशन डिजिटल शेतीशाळा मोहिमेअंतर्गत शेतकऱ्यांना भात पीकाबाबत मार्गदर्शन करण्यात आले.
कृषि विभागाच्या योजना, ॲग्रिस्टॅक योजना, मग्रारोहयो योजना यांचा लाभ कसा घेता येईल याबाबत जाधव यांनी मार्गदर्शन केले. ज्यांचे ‘फार्मर आयडी’ अद्याप तयार झाले नाहीत, त्यांनी ते तत्काळ काढून घेण्याबाबत सूचित केले. या वेळी मावळ कृषि अधिकारी मारुती साळे, तंत्र अधिकारी क्षीरसागर, नागनाथ शिंदे, विकास गोसावी, सरपंच रोहन जगताप, ग्रामपंचायत अधिकारी रोहिणी खामकर, नागेश हेमबाडे यांच्यासह शेतकरी उपस्थित होते.

शेतकऱ्यांनी उत्पन्न वाढविण्यासाठी भात लागवड चारसूत्री, एस.आर.टी पद्धतीने करावी. कृषि विभागाच्या विविध योजनाचा जास्तीत जास्त लाभ घ्यावा. महाडीबीटी साइटवर सर्व योजनांचे ऑनलाइन फॉर्म भरावेत. ॲग्रिस्टॅक, फार्मर आयडी सर्व योजनांसाठी आवश्यक आहे.
- सुनील जाधव, उपविभागीय कृषी अधिकारी, पुणे