काळेवाडी, ता.२२ : काळेवाडी, रहाटणी परिसरातील विविध कॉलनी व गल्ल्यांच्या फलकांची दुरवस्था झाली असून अनेक ठिकाणी फलक नसल्याचे दिसून येत आहे. तर बऱ्याच ठिकाणचे फलक अडगळीला, चोरीला गेल्याचे अथवा एका कोपऱ्यात पडले असल्याचे दिसून येत आहेत. त्यामुळे कॉलनी, गल्ल्यांचे नामफलकांची दुरुस्ती, नूतनीकरण करण्याची मागणी नागरिकांकडून होत आहे.
एखाद्या परिसराची किंवा त्या भागांतील कॉलनी, गल्ल्यांची कामानिमित्त आलेल्या नवख्या व्यक्तीला माहिती व्हावी यासाठी ठिकठिकाणी संबंधित कॉलनीचे आणि गल्ल्यांचे नामफलक महापालिकेकडून लावले जातात. त्यावर लाखो रुपये खर्च केले जातात. मात्र, काळेवाडीतील अमरदीप कॉलनी, ज्योतिबानगर, विजयनगर, भारत माता चौक तसेच रहाटणी परिसरातील विविध ठिकाणी हे नामफलक अनेक ठिकाणी कायमस्वरूपी अडगळीला पडल्याचे व काही ठिकाणी ते तोडून कोणीतरी लंपास केल्याचे दिसून येत आहेत. काही फलक
जुने व खराब झाल्याने ते निरुपयोगी ठरले आहेत.

विकास कामे अन् चोऱ्या
रस्ता दुरुस्तीसह इतर विकास कामांमुळे संबंधित ठेकेदार आणि त्यांचे कामगार हे नामफलक काढून अडगळीच्या ठिकाणी टाकल्याचे दिसून येत आहेत. त्यांच्या लोखंड, पाईपाचा भंगार व्यावसायिक, भुरटे चोर गैरफायदा घेत असून ते विकून त्यातून पैसे कमावण्याची शक्कल लढवत आहेत.

गेल्या वर्षभरापासून महापालिकेचे सूचना फलक एका अडगळीच्या ठिकाणी भिंतीला लागून पडून असून महापालिकेचे प्रशासनाकडून आजपर्यंत कोणत्याही अधिकाऱ्याने किंवा कर्मचाऱ्यांनी याविषयी दखल घेतलेली नाही. मोठ्या प्रमाणात कर घेणारे महापालिका नागरिकांच्या सोयीकडे असे दुर्लक्ष का करते ? महापालिकेने हे माहिती फलक त्वरित लावावेत.
- यश मुरकुटे, अमरदीप कॉलनी, ज्योतिबानगर

महापालिकेचे स्थापत्य विभाग व आकाशचिन्ह विभाग विविध ठिकाणी महापालिकेचे कार्यक्रम व प्रसिद्धीचे फलक लावतात. परंतु नागरिकांना उपयुक्त व सोयीचे ठरणारे माहिती फलक का लावत नाहीत ? हा मोठा प्रश्न आहे. महापालिका अर्थसंकल्पामध्ये लाखो रुपये खर्च करते. पण, त्याची तरतूद कुठे जाते ? महापालिका प्रशासनाने लक्ष देऊन फलकांची दुरुस्ती व आवश्यक तेथे नव्याने लावण्याची व्यवस्था करावी.
- अजित सातव, रहिवासी, ज्योतिबानगर, काळेवाडी